Qırımda sabıq Rusiye insan aqları vekâletlisi Larisa Opanasük vefat etti, dep haber ete Mash Telegram kanalı.
Memur 2023 senesi mayıs ayında bergen arizası esasında işten çıqarıldı.
Larisa Opanasük 60 yaşında edi. 2000-lerden Qırım Muhtar Cumhuriyetiniñ Nazirler şurasında farqlı vazifelerde çalıştı. 2014 senesi Rusiye Qırımnı işğal etken soñ Kreml kontrolindeki Qırım ükümetiniñ azası oldı, Qırımnıñ Rusiye yolbaşçısı Sergey Aksenovnıñ yaqın ortaqları sırasına kirgen edi.
2014 senesinden başlap Qırımnıñ Rusiye ükümetinde baş nazir muavini edi. 2019 senesi sentâbr ayında Qırımnıñ yerli şuralarına Rusiye saylavlarından soñ Qırım ükümetiniñ diger azalarınen beraber istifağa çıqtı. Amma yañı ükümet erkânına kiremedi.
2019 Senesi noyabr ayında Moskva kontrolindeki Qırım ombudsmeni vazifesine tayin etildi. 2023 senesi mayıs ayına qadar bu vazifede edi.
Larisa Opanasük – qırımlılar Anna ve Mariya Opanasüklerniñ anasıdır (ANNA MARIA Ukrayına dueti).
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
