İşğal etilgen Qırımda Rusiye İç işler nazirligi ukrayınalı siyasiy mabüslerni qorçalağan advokat Aleksey Ladinni advokat litsenziyasız qaldıruv meselesini çeze, dep bildirdi. Bu aqta polisniñ matbuat relizinden belli oldı.
Ladinni litsenziyasız qaldırmaq içün polis ne yapa aytılmay. «Mediazona» qayd etkenine köre, advokatnıñ areketlerinde nizamnı bozuv olğanını isbatlamaq içün regional palatanıñ komissiyası kerek. Ladin Tümen vilâyetiniñ palatasında buluna. Qalğan müessiseler tek muracaat ete bile.
Ladin oktâbrniñ 13-nde Aqyardaki dairesinde keçirilgen tintüvden soñ tutuldı. Mahkeme onı yasaqlanğan timsallerni köstergeni içün (Rusiyeniñ Memuriy uquq bozuvları kodeksiniñ 20.3 maddesiniñ 1-inci qısmı) 14 künge apiske aldı. Davanıñ sebebi mabüs İsmail Ramazanovnıñ resimleri olğan Qırım.Aqiqatnıñ bağlantısı oldı. Fotoresimlerde ekspertler Rusiye Yuqarı mahkemesi terror teşkilâtı dep tanığan «Noman Çelebicihan batalyonınıñ» timsallerini «kördi».
«Vatandaş uquqiy birleşmelerden biriniñ vekili olıp, Rusiyede yasaqlanğan teşkilâtlarda iştirak etkeninden şübheli olğan ya da memleketimizde terror faaliyetini yapqanında qabaatlanğan şahıslarnıñ imayecisi oldı», – dep aytıla Rusiye polisiniñ haberinde.
Mahkeme advokatqa Facebookta cenkke qarşı paylaşuv yapqanından Rusiye ordusını «itibardan tüşürüv» (Rusiye Federatsiyasınıñ Memuriy uquq bozuvlarınıñ 20.3.3 maddesi) davasına istinaden 45 biñ ruble para cezasını berdi. Advokat «Rus dünyasında» bir kün» adlı maqale paylaşqan ve «CENNKEYOQ» tagini qullanğan eken.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
