Ukraina Yuqarı Radasınıñ insan aqları vekâletlisi Lüdmila Denisova ATR telekanalınıñ saibi Lenur İslâmovğa qarşı Qırımdaki dava esnasını «qanunsız mahkeme» dep adlandırdı ve dekabrniñ 10-nda çıqarılğan ükümni takbih etti. O, halqara toplulıqnı Aqmescitteki mahkeme qararına cevap bermesine çağırdı.
«İşğalci akimiyetniñ areketlerini takbih etem ve sahte «Qırım Yuqarı mahkemesiniñ» qararını tanımayım, çünki Ukraina vatandaşına qarşı bütün qabaatlavlar uydurıldı ve siyasiy sebepleri bar, sekiz maddege istinaden açılğan cinaiy dava ise sahte ola», – dep yazdı o, Facebookta.
Denisova, bu esnasta Avropa İnsan aqları şartnamesi bozuldı, dep qayd etti.
«Bu ayıp qanunsız mahkeme başlağanından berli Lenur İslâmov davanıñ adaletli baqıluv, adalet ve semereli uquqiy imaye aqqından marum etildi, bu da Avropa insan aqları şartnamesiniñ 6, 13 maddelerini boza», – dep qayd etti ombudsmen.
O, «halqara uquq normalarına riayet etilmesi» içün halqara toplulıqnı «Ukraina vatandaşlarına qarşı yapılğan repressiyalarğa cevap berip, Rusiyege qarşı basqını quvetleştirmesine» çağırdı.
Rusiye kontrolindeki Qırım Yuqarı mahkemesi dekabrniñ 10-nda ATR telekanalınıñ saibi Lenur İslâmovnı 19 yıl sert rejimli koloniyada qalmasına ğıyabiy şekilde üküm etti. İslâmovnıñ özü bu esnasta iştirak etmedi.
Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
