Lübnannıñ paytahtı Beyrutta avgustnıñ 4-nde olğan küçlü patlav neticesinde elâk olğanlarnıñ sayısı artmağa devam ete. Soñki malümatqa köre, 137 insan elâk oldı, onlarnen kişi ğayıp oldı, eñ az beş biñ insan yaralandı, dep bildirdi avgustnıñ 6-nda memleketniñ Sağlıq nazirliginiñ vekili, dep haber ete Azatlıq Radiosı.
Tahqiqatçılar facianıñ sebeplerini bilmek içün Beyrut limanı rayonındaki patlav yerinde çalışmağa devam ete.
Patlav limannıñ bir qısmını yoq etip, şeer merkezinde büyük zararlarğa yol açtı.
Akimiyet, ammiaklı selitra yükü patladı, dep bildirdi. Patlav telükesi olğan bu madde yıllar devamında limanda telükeli şaraitlerde saqlanğan edi. Liman reberligi avgustnıñ 5-nde ev apsine alındı.
Akimiyet iqtisadiy buhran ve cemaatçılıqnıñ tenqidi vaqtında patlav neticelerini yoq etmege tırışqanda Lübnanğa gumanitar yardım kelip başladı.
Lübnan paytahtınıñ tahminen 300 biñ sakini evsiz köaldı. Kütleviy haber vastalarınıñ malümatına köre, patlavlar neticesinde zahire yerleri zarar kördi: şeerde olğan zahireniñ 85%-i patlav vaqtında yoq olğan yerlerde saqlanğan edi.
