Vatandaş serbestligi merkezi İlk küzniñ 3-nde Kıyivde "Zorlav alâmetlerinen ğayıp oluvlar ve universal yurisdiktsiya printsipi: Rusiye Federatsiyası vatandaşlarını taqip etüv istiqballeri" tedqiqatınıñ taqdimi ile ekspert brifingi keçirdi. Tedbirde Birleşken Milletler Teşkilâtınıñ memurları ve ABD, Kanada, Felemenk ve diger devletlerniñ diplomatları iştirak etti. Bunı Qırım reintegrasiya assotsiasiyası bildire.
Munaqaşanı ekspertler teşkil ettiler: professor Oleg Martınenko, aq qoruyıcı Maksim Butkeviç, Arbiy esirlerge munasebet boyunca koordinasion ştabınıñ vekili Oleg Guşçin ve Arbiy esirlerniñ qorantaları assotsiasiyasınıñ vekili Yekaterina Nazariy.
Körüşüv iştirakçileri üçünci memleketlerde Rusiye arbiy cinayetçilerine qarşı universal yurisdiksiyanıñ qullanuvı, vatandaş cemiyetiniñ faaliyeti ve Koordinasion ştabnıñ vekâletleri ve vazifelerini muzakere ettiler.
Brifingge Qırım reintegrasiya assotsiasiyasınıñ eksperti Boris Babin de qoşuldı. O, Rusiyeniñ işğal etken Ukrayina topraqlarında, şu cümleden Qırımda, insanlarnıñ zorbalıqnen ğayıp olmasına qarşılıq kösterüv teşkilâtınıñ talilini paylaştı ve BM mütehassıs komitetleri ve iş gruppalarınen işbirligini tafsilâtlıca tarif etti.
Ekspert, zorbalıqnen ğayıp olğanlarnıñ hatırasını ebediyleştirüv, duşmanlıq tiliniñ faktorları, genosid çağıruvları, siyasiy repressiyalar ve qaçırılğan şahıslarnıñ mecburiy köçürüvi meselelerine diqqat ayırdı.
Bundan ğayrı, Assosiasiya temsilcisi, demokratik memleketlerde yaşağan hırsızlanğan vatandaşlarnıñ tuvğanlarına qanunsız şekilde tesir etmek içün Rusiye istihbaratınıñ ıntıluvları ile bağlı telükelerge diqqat çekti.