Körbekteki suv anbarı. Suv nasıl kete (fotoresimler)

Qırımdaki suv vaziyeti qıyın qala. Yağanaqlar yağmay ve qurğaqlıq devam ete, yarımadadaki suv anbarlarında suv seviyesi azala.

2020 senesiniñ baarinden başlap Aqmescit, Aqmescit, Bağçasaray ve Qarasuvbazar rayonlarına suv bergen esas çoqraqlarda ciddiy suv qıtlığı közetile. Aqımdaki seneniñ yazından berli cenübiy şeerlerde de aynı qıyınlıqlar qayd etile.

Soñki aftalarda Aluşta civarındaki Körbekniñ suv anbarı quruy. Bir ay içinde aman-aman 1 mln kubometrge eksildi. Şimdi 13,25 mln kubometr ile suvnıñ yarısından azı bar. Körbek suv anbarına kirgen Ulu Özen de qurıp qaldı.

Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi. Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.

BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.

Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.

Aluşta civarındaki Körbek suv anbarını fotoresimlerde körmeñiz mümkün.