Link açıqlığı

Saatnıñ esas haberi

«Köküs ağrıları, tutuluv, podagra»: SİZOda tutulğan Gafarovnıñ tuvğanları ayatı içün qasevetlene


Cemil Gafarov
Cemil Gafarov

Aqmescitteki ekinci «Hizb ut-Tahrir davasısınıñ» mabüsi Cemil Gafarovnıñ ömür arqadaşı Raziye bir yıldan berli Aqmescit SİZOsında yatqan aqayınıñ ayatı içün qasevetlene. Onıñ aytqanına köre, Gafarovnıñ alı fenalaşa.

Apiske alınğan qırımlı yaramay alı aqqında tuvğanlarına mektüpte bildirdi.

«Er saba üylege qadar köküsimniñ sol tarafı ağıra, ne feldşer, ne ekim kele. Ekimler baqmay, olarğa barmaq içün ariza beresiñ, üç kün içinde seni çağıralar. Baqsa da – tek qan basımını baqalar. Ayaqlarım pek ağıra, büyrek hastalığınıñ aqibetleri sebebinden buğumlarım ağıra – podagra. Büyrekler sebebinden er kün tizimden ayaq tübüne qadar tutula. Qas basımını ölçmek pek qıyın», – dep paylaştı aqayınıñ mektüp parçasını Facebookta Raziye Gafarova.

Onıñ qayd etkenine köre, «apiste keçirgen er künü Cemil içün ayat küreşi ola».

SİZO reberligi Gafarovnıñ sağlıq vaziyeti aqqında bir malümat bermey.

Gafarovnıñ daa evel bildirgenine köre, Aqmescitteki tahqiqat izolâtorınıñ hadimleri oña basqı yapa, qırımlınıñ sağlıq vaziyeti bundan fenalaşa. Qırım.Aqiqat, Qırımdaki penitentsiar hızmeti ait olğan Rusiye Cezalarnı yerine ketirüv federal hızmetine muracaat yolladı, Rusiye apishane vekilleriniñ fikrini ögrenecek edi. Lâkin müessise alâ daa cevap bermedi.

Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı. Advokat, müvekkiliniñ tibbiy tedqiqlerine dair arizanı Aqmescit SİZOsınıñ memuriyetine berdi.

Fevralniñ 4-nde Rusiye kontrolindeki Qırım ombudsmeni Larisa Opanasük, Aqmescitteki ekinci «Hizb ut-Tahrir» davasınıñ mabüsi Cemil Gafarovnı №1 Aqmescit SİZOsında ziyaret etti, dep bildirgen edi. Onıñ aytqanına köre, Gafarov ombudsmenden saqatlığınıñ uzatılmasında yardım etmesini rica etti. Opanasük bildirgenine köre, o, sağlıq vaziyeti ve SİZOda tutuv şaraitlerini şikâyet etmey.

«Memorial» Rusiye aq qorçalayıcı merkezi Cemil Gafarovnı siyasiy mabüs dep tanıdı.

2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG