Kyivde iyünniñ 26-nda Qırımtatar bayraq künü merasimi çerçivesinde 40 metrlik altın tamğalı kök bayraq açıldı. Qırım.Aqiqat mühbiriniñ bildirgenine köre, bayraqnı 100-ge yaqın insan taşıdı.
Kyivde Qırımtatar bayraq kününe bağışlanğan avtoyürüş ve vatanperverlik yürüşi keçirildi.
Avtokolonna İgor Sıkorskıy Kyiv politehnik universitetiniñ baş binası yanında şekillendi. Maşinalarına qırımtatar ve Ukraina bayraqlarını bağlağan kolonna Kyivniñ merkeziy Hreşçatık soqağına yol aldı.
Kolonna ögünde de farqlı memleketlerden kelgen göñülliler dünyanıñ 28 memleketinde olğan qırımtatar bayrağını taşıdı. Meydan tarafına vatanperverlik yürüşi başlağan soñ olarğa avtoyürüş qoşuldı. Olar miting keçirilgen yerge qadar beraber kettiler.
«Soñki 5 yıl devamında bizim içün – bu (qırımtatar bayrağı – QA) tek birligimizniñ timsali degil, qırımtatar aslımıznıñ timsallerinden biridir. Vatanımızğa serbest saip çıqamayıq, çünki anda işğalciler bar. Şu sebepten cümlemiz bayraq etrafında toplaşamız, tek Ukrainada degil, bütün dünyada», – dep qayd etti Qırımtatar Milliy Meclisiniñ reisi Refat Çubarov.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
