Kyivde kritik infrastruktura obyektlerine qarşı saba raketa darbesi sebebinden üç insan elâk oldı, dep haber etti Ukrayına paytahtınıñ şeer yolbaşçısı Vitaliy Kliçko.
«Bugün Kyivniñ kritik infrastruktruasına yapılğan ücümi neticesinde üç insan elâk oldı. Bu kritik infrastruktura obyektlerinden biriniñ hadimleri ola», – dep yazdı Kliçko Telegram kanalında.
Onıñ aytqanına köre, saba Rusiye raketaları tüşken eki obyekt zarar kördi. Elâk olğan eki kişi aqqında haber etildi.
Oktâbrniñ 18-nde saba Rusiye ordusı kene Kyivge ücüm etti. Yerli akimiyetniñ malümatına köre, raketa darbelerinden soñ eki kritik infrastruktura obyekti zarar kördi, aqibetlerini yeñüv devam ete. Kyivliler elektrik ve suv teminlevi qısmen sıñırlanacaq, dep tenbilendi.
Oktâbrniñ 18-nde Kyivden ğayrı Rusiye Dnipro, Harkiv, Jıtomır ve Mıkolayıvge ücüm etti.
Ukrayına Silâlı quvetleriniñ Ava quvetleri komandanlığınıñ spikeri Yuriy İgnat Rusiye aviatsiyası bugün saba Rostov vilâyetinden Kyivge ve Ukrayına vilâyetlerine ücüm etti, dep bildirdi.
Soñki vaqıtları Rusiye ordusı Ukrayınanıñ energetik infrastruktura obyektlerine qarşı ateşlerini quvetleştirdi. Ücüm içün qanatlı raketa, «topraq-topraq» ava mudafaası raketalarını ve İran bergen Shahed-136 kamikadze-dronlarını qullana. Keçken afta büyük ücüm vaqtında 15 kritik infrastruktura obyektlerine zarar ketirildi.
Rusiye prezidenti Vladimir Putin oktâbrniñ 10-nda Rusiyeniñ Ukrayınağa, hususan energetika obyektlerine darbe endirgenini tasdıqladı. Aynı vaqıtta o, «Rusiye toprağında terror ücümlerini kerçekleştirmege tırışsalar», yañı ücümnen qorquzdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
