Kyivde «Ukrfileksp 2018» XVI Milliy filatelistik sergisi çerçivesinde Rusiyeniñ işğal etilgen Qırım pulları numayış etildi, dep bildire Qırım.Aqiqat mühbiri.
Bu serginiñ teşebbüsçisi «Mecburen köçip kelgenlerniñ birligi» ukrain cemaat teşkilâtı oldı.
Teşkilât vekili, tarihiy ilimler namzeti, Tavriya gumanitar platformasınıñ koordinatorı Andriy İvanets jurnalistlerge ve sergi musafirlerine Qırım mevzusında numayış etilgen sergi işleriniñ esas ğayesi aqqında tarif etti.
«Rusiye Qırım ilhaqını qanunlaştırmaq içün poçta pulları, zarf, poçta levhaları ve diger şeylerni keniş bir sürette qullanıp, «gibrid cenk» usullarını filateliyağa çevirdi. Bunı añlatıp, cemaatnıñ diqqatını celp etmege isteymiz, Rusiyeniñ istilâiy adımlarına qarşı areket etmek kerek», – dep izaatladı İvanets.
XVI Milliy filatelistik sergi Kyivde oktâbrniñ 9-nda, Dünya poçta kününde, açıldı. O, ukrain poçta pulınıñ 100 yıl yubileyine bağışlana. Sergide Ukraina, Ermenistan, Poloniya ve Çeh Cumhuriyetinden 127 toplam numayış etilmekte.
Rusiyeniñ AO «Marka» ve «Poçta Rossii» müessiseleri Dünya poçta birligi ve «Ukrpoştanıñ» işğal etilgen Qırım markalarınen bağlı talaplarına qulaq asmaylar.
2018 senesi mayısnıñ 29-ı, iyünniñ 8-i ve 20-nde Rusiyede «Rusiye subyektleri ve şeerleriniñ alemleri» mevzusında blok çıqarıldı. Onıñ kenarında işğal etilgen Qırım ile Rusiye haritası tasvirlengen. Noyabrniñ 6-nda qomşu Rusiyede Keriç boğazındaki köpür resimi ile marka çıqarılacaqtır.
