Kyivdeki Rusiye elçihanesi ögünde oktâbrniñ 26-nda «Cinayet ve ceza» adlı aktsiya keçirildi. Onıñ çerçivesinde «KrımSOS» cemaat teşebbüsiniñ faalleri Rusiyeden işğal etilgen Qırımda insan hırsızlanmalarını tahqiq etmesini talap ete. Bu aqta Qırım.Aqiqat mühbiri haber ete.
Advokat Nikolay Polozovnıñ aytqanına köre, bunıñ kibi aktsiyalar «ilk evelâ içinde bir ümüt qalsın dep kerek».
«Rusiyeniñ Qırım işğali başlağanınen yarımadağa belâlar keldi, daa evel olarnı tasavvur etmek bile zor edi. İnsanlar hırsızlana, öldürile, Ukraina vatandaşları, ilk evelâ qırımtatarlarğa qarşı repressiyalar yapıla. Anda yaşağan insanlar bu deşet biter, hırsızlanğanlar, şu cümleden Ervin İbragimov evine qaytar, dep ümüt eteler», – dedi Polozov.
Aktsiya vaqtında faaller Rusiye elçihanesi yanındaki qorada beyaz levha asıp, «44», «15», «6» raqamlarını yazdı. «KrımSOS» cemaat teşebbüsiniñ tesisçilerinden biri Tamila Taşevanıñ bildirgenine köre, «44» raqamı hırsızlanğanlarnıñ sayısını, «15» tapılmağanlarnıñ sayısını, «6» ise Rusiyeniñ Qırım işğali vaqtında ölü tapılğanlarnıñ sayısını aks ettirmekte.
2016 senesi mayısta Bağçasarayda kimligi belli olmağan insanlar Dünya qırımtatar kongressi icra komitetiniñ azası Ervin İbragimovnı qaçırğan edi. Video nezareti kamerası Rusiye yol hızmeti urbasında eki insan İbragimovnıñ maşinasını toqtatıp, onı öz mikroavtobuslarına mindirgenlerini çıqardı. Qırım aq qorçalayıcı gruppası, Ervin İbragimovnı Rusiye akimiyeti ya da olarnıñ kontrolinde olğan taqımlar qaçırdı, dep tahmin ete.
Rusiye Taqiqat komitetiniñ Qırım idaresi qaçıruv aqqında cinaiy iş açqan edi. Faqat bugünge qadar Ervinniñ bulunğan yeri aqqında bir malümat yoq.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Faallerniñ malümatına köre, Rusiyeniñ Qırım işğalinden soñ 44 qırımlı ğayıp oldı, 15 kişi alâ daa tapılmadı.
