Martnıñ 1-nde Kyivdeki Rusiye elçihanesi ögünde «FIND&FREE» informatsion kampaniyası çerçivesinde «Qırım baariniñ» anti qaramanı nezaketli insanlarnıñ keskinleşmesine nasıl sebep oldı» aktsiyası olıp keçti.
Qırım.Aqiqat mühbiriniñ bildirgenine köre, bu «KrımSOS» cemaat teşebbüsiniñ faalleri er ay keçirgen 32-nci aktsiya ola. Onı 2014 senesi martnıñ 3-nde hırsızlanğan qırımlı Reşat Ametovğa bağışladılar.
«Qırımda ilk ölüm Reşat Ametov olğanını epimiz hatırlaymız. İşğal etilgen Qırım tarihında ilk sefer insan hırsızlanğan edi. Amma o vaqıttan berli bir tahqiqat keçirilmey», – dep ayttı aktsiya vaqtında «KrımSOS» cemaat teşebbüsiniñ koordinatorı Tamila Taşeva.
Aktsiya vaqtında faaller Reşat Ametovnı hırsızlağanlarnıñ betleri körüngen levhalarnı bilgisayarda kösterdi.
Qırım ilhaqından soñ, yarımadada hususan qırımtatarları ğayıp olıp başladı. Bu arada Rusiye nezaretindeki Qırım Tahqiqat Komiteti «yarımadada qırımtatarları kütleviy bir şekilde ğayıp olmay» dey.
Faallerniñ malümatına köre, Rusiye Qırımnı ilhaq etken soñ, Qırımnıñ 44 sakini coyulğan, 15-i aqqında alâ daa iç bir malümat yoq.
