Kyivdeki Rusiye elçihanesi ögünde Qırımda hırsızlanğan insanlarnıñ tuvğanları ve yaqınlarına qol tutmaq maqsadınen 50-nci aktsiya ötkerildi. Bu aqta «KrımSOS» cemaat teşkilâtı bildire.
«Mında endi 50-nci kere kelemiz, lâkin bu vaqıt devamında tahqiqat neticesi olmadı. İşğalniñ 6 yılı devamında 44 insan hırsızlandı, dep saydıq. Altısı daa soñra işkence izlerinen ölü tapıldı. 15-i aqqında alâ daa bir şey belli degil», – dep haber etti «KrımSOS» teşkilâtı.
Aq qorçalayıcılarnıñ qayd etkenine köre, 15 insannıñ hırsızlanmasınen bağlı semereli bir tahqiqat olmadı, mesüliyetke çekilgenler yoq.
Ukraina Tış işler nazirligi dünya toplulığını işğal etilgen Qırımda ve Donbas topraqlarında insanlarnıñ hırsızlanmasına diqqat ayırmasına çağırdı. Bu beyanat müessiseniñ resmiy saytında Hırsızlanğan insanlar künü munasebetinen derc etildi.
Qırım işğalinden soñ yarımadada insanlar, hususan qırımtatarlar hırsızlanıp başlandı. Qırımdaki Rusiye Tahqiqat komiteti «yarımadada qırımtatarlar kütleviy şekilde hırsızlanmay», dep bildire.
Alâ daa haber alınmağan ğayıp olğan insanlar cedveli derc etilgen edi. Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Kostenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
