Kyivdeki «Qırım ailesi» qırımtatar medeniyet-tasil merkezinde sentâbrniñ 22-nde yañı oquv yılınıñ tantanalı açılış merasimi olıp keçti.
Bunı «Ukrinform» haber ete.
Tedbirde qırımtatar cemiyetiniñ temsilcileri, Qırımtatar Milliy Meclisiniñ reisi Refat Çubarov ve reis muavini Ahtem Çiygoz iştirak ettiler.
Merasim «Ant etkenmen» qırımtatar gimni ve Ukraina devlet gimniniñ icra etilmesinden, em de duadan başladı.
Kyivdeki merkez yerleşken 165-inci mektebiniñ müdiresi Lüdmila Vaşkulat toplaşqan musafirlerni selâmlap, dört yıl devamında faaliyet köstergen «Qırım ailesi» Qırımdan köçip kelgen balalarnıñ birleşmesi ve inkişafına büyük isse qoşqanını qayd etti.
«Oğlan ve qızçıqlar ana tilini ögrene, yırlay ve oynaylar. «Qırım ailesiniñ» talebeleri Ukrainanıñ oyun ve yır festivallerinde faal iştirak ete, qırımtatar medeniyetini çetelde de temsil eteler», – dedi o.
Mektep müdiri, 2014 senesi qurulğan merkezniñ talebeleri çeşit cemaat tedbirleri ve aktsiyalarında söz ustaları, yırcı ve oyuncılar olaraq iştirak etkenini tarif etti. Aqımdaki sene küçük istidatlı balalarnıñ ustalığını Türkiye ve Frenkistandaki halqara festivallerniñ seyircileri ve iştirakçileri kördi.
Halqara teşkilâtlar Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı.
