Kyivdeki mahkeme apiske alınğan «RİA Novosti-Ukraina» yolbaşçısı Kirill Vışinskiyni şahsiy mecburiyeti şartınen SİZOdan yiberdi. Bu aqta «İnterfaks-Ukraina» agentligi mahkeme salonından haber ete.
Berilgen malümatqa köre, Kyiv istinaf mahkemesi Kyiv Podil rayon mahkemesiniñ 2019 senesi iyülniñ 19-nda «RİA Novosti-Ukraina» reberini apiste tutmağa teklif etken qararını lâğu etip, sıñırlav tedbirini şahsiy mecburiyetke deñiştirdi.
Qırım Muhtar Cumhuriyetiniñ prokuraturası bu malümatnı tasdıqladı.
Daa evel Kyiv istinaf mahkemesi «RİA Novosti-Ukraina» reberi Kirill Vışinskiyniñ imayesi bergen apis cezasını lâğu etüv şikâyet arizasını baquv kününi deñiştirgen edi.
«RİA Novosti-Ukraina» baş muarriri Kirill Vışinskiy 2018 senesi mayısnıñ 15-nde Kyivde devlet hainliginden (Ceza kodeksiniñ 111-inci maddesi) şübheli sayılıp tutulğan edi. Eki künden soñ apiske alındı ve bugünge qadar SİZOda buluna.
Vışinskiy anayasa qurumını devirmege tırışqanında (Ceza kodeksiniñ 109-ıncı maddesi), separatizmde (Ceza kodeksiniñ 110-uncı maddesi), milliy duşmanlıq doğurğanında (Ceza kodeksiniñ 161-inci maddesiniñ 1-inci qısmı) ve silânı qanunsız saqlağanında (Ceza kodeksiniñ 263-ünci maddesiniñ 1-inci qısmı) qabaatlana. Vışinskiy «RİA Novosti-Ukraina» reberi olıp, «Rusiyeniñ Ukrainağa qarşı yıquv faaliyetine yardım etkeninde» qabaatlana.
Prokuratura versiyasına köre, Vışinskiy 2014 senesinden başlap 2018 senesine qadar agentliginiñ saytında «Ukrainağa qarşı» 72 maqaleni derc etti, bu faaliyet içün para MİA «Rossiya Segodnâ» müessisesinden Qıbrız offşorı ve Sırbistandaki şirket üzerinden kele edi.
Vışinskiy bütün qabaatlavlarnı inkâr etip, özüne qarşı davanı siyasiy sebeplernen bağlay. Apiske alınğan soñ Vışinskiy Ukraina vatandaşlığından vazgeçti ve Rusiye prezidenti Vladimir Putinden yardım istedi. Rusiye Tış işler nazirligi Ukrainadan Vışinskiyni azat etmesini defalarca talap etip, onıñ taqip etilüvini siyasiy sebeplernen bağlay edi.
