Qırımnı Ukrainadan «satın almağa» teklif etken Rusiye siyasetçisi İrina Hakamadanıñ Kyivdeki biznes forumında çıqışı lâğu etildi. Bu aqta siyasetçiniñ çıqışını teşkil etken Taryan Group şirketi Facebookta haber etti.
«Bizler büyük bilgi tedbirini yapıp, musafirlerimizge ilham bermege isteymiz. Dünyanıñ çeşit köşelerinden spikerlerni davet etip, ömür tecribesi ve qıymetlerinen paylaşmalarını isteymiz… Musafirlerimizden afu soramağa isteymiz, çünki planlaştırılğan spikerlerden biri – biznes idmancısı İrina Hakamada – DreamBIG Forumda iştirak etmeycek. Teşkerüv yapıp, kelmesini belli organlarnen muzakere etsek de, onıñ çıqışından vazgeçmege mecburmız», – dep aytıla haberde.
Qırımtatar Milliy Meclisiniñ reisi Refat Çubarov Hakamadanıñ Kyivni ziyaret etmek niyetini Facebookta izaatlap, «Qırım işğaline qoltutqan insanlar endi Ukrainağa azırlana», dep bildirdi.
Qırım işğalinden soñ Hakamada Rusiyeniñ Qırımğa qarşı yapqanlarını ilhaq olaraq sayğanını ve kontributsiya ödep, yarımadanı Ukrainadan satın almağa teklif etken edi.
«E, referendumğa baqmadan, bu ilhaq edi. O, normal şaraitlerde degil, zıddiyet vaziyetinde keçirilgen edi. Şunıñ içün men, bir taraftan, Yavlinskiynen razım, tekrar qanunğa uyğun bir referendum olmalı. Amma diger taraftan – Grigoriy Alekseyeviçke köre, referendumnı tekrarlasaq, yekâne nezaketli askerimiz olmasa da, OSCE olsa bile, bunıñ bir neticesi olmaycaq. Çünki ekseriyet Rusiyege rey berse bile, Ukraina ep bir qarşı çıqa», – dep aytqan edi Hakamada.
Onıñ aytqanına köre, «neticede memleketlerimiz arasında yañı cenk kerginleşüvi, felâket ola bile». «Ukrainağa kontributsiya ödese, daa yahşı ve qolay olur, dep tüşünem», – degen edi Rusiye siyasetçisi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
