Kyivde Almaniya elçihanesi ögünde «Kreml siyasiy mabüsleriniñ tuvğanları» teşkilâtınıñ falleri Avropa Şurası ve PACEde Rusiyege qarşı sanktsiyalarnıñ lâğu etilmesine qarşı narazılıq bildirdiler. Bu aqta Qırım.Aqiqat mühbiri bildirdi.
Aktsiyada tahminen 30 faal, aq qorçalayıcı, siyasiy mabüslerniñ tuvğanları bar edi. Qollarında Kremlniñ ukrainalı siyasiy mabüslerini azat etmek çağıruvlarınen yazuvlı şiarlar bar edi.
«Rusiyege qarşı sanktsiyalar – bugünki künde Rusiyege basqı yapacaq yekâne yoldır, biz – siyasiy mabüslerniñ tuvğanları – Rusiye teslim olıp, tuvğanlarımıznı evlerine yiberir, dep ümüt etemiz», – dedi İgor Kotelânets, Qırımda «ukrain diversantları» davası boyunca mahküm etilgen Yevğen Panovnıñ qardaşı.
Faaller Almaniya elçihanesine kantsler Angera Merkelge siyasiy mabüslerni azat etüv meselesiniñ al etilüvinen bağlı teklifleri ile muracaat berdi.
«Eziyet ve repressiyalarğa alâqası olğan Rusiye memurlarına qarşı basqı quvetleştirilmesi içün «Magnitskiy aktını» qabul etmege çağıramız», – dep qoştı Kotelânets.
Daa evel haber etilgeni kibi, Ukraina prezidenti Petro Poroşenko Almaniya kantsleri Angela Merkel ile Rusiye tutqan ukrainalılarnıñ azat etilüvini muzakere etti.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete. BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız şekilde tuta. Olarnıñ sırasına 2018 senesi noyabrniñ soñunda Qara deñiz yalısında zapt etilgen 24 ukrainalı deñizci ve Donbastaki esirler kirmey.
