Ukraina halq deputatı Dmıtro Tımçuk («Narodnıy front» firqasınıñ fraktsiyası) iyünniñ 19-nda Kyivde elâk oldı.
Bu aqta «İnterfaks-Ukraina» ukrain haber agentligi bildire, malümatnı elâk olğannıñ zenaatdaşı, Yuqarı Rada deputatı Anton Geraşçenko da tasdıqladı.
«Bir saat evelsi öz evinde mukâfat pıştavını temizlegende Ukraina vatanperveri ve dostum Dmıtro Tımçuk özüne öldürdi. Facia yerinde tahqiqat-operativ gruppası çalışa. Samimiy ve açıq göñülli insan ebediy hatıramızda. Epimiz seniñ olmağanını is etecekmiz», – dep yazdı Geraşçenko Twitterde, haber ete Azatlıq Radiosı.
Ukraina müessiseleri bu malümatnı şimdilik tasdıqlamay.
Dmıtro Tımçuk 46 yaşında edi, Rusiyeniñ Çita şeerinde doğdı. Qırım ilhaqı ve Donbastaki zıddiyet başlağan soñ yedek podpolkovniki Tımçuk «İnformatsion tirenüv» gruppasınıñ koordinatorı, ukrain blogeri oldı. Qırım ilhaqı, Donbastaki cenk uruşları, Ukrainada Rusiye diversion faaliyeti ve separatist çıqışlarını tafsilâtlıca aydınlatqanı içün belli oldı. 2014 senesi oktâbr ayında VIII çağırılış Ukraina halq deputatı oldı.
