Kyivde Rusiyeniñ raketa ücümi neticesinde Arnavutlıq, Argentina, Filistin, Şimaliy Makedoniya, Portugaliya ve Montenegro elçihaneleriniñ binaları zarar kördi. Bu aqta Ukrayina Tış işler nazirligi Nastoyaşçeye Vremâ neşirine bildirdi. Binalardan ğayrı, diplomatik missiyanıñ maşinaları zarar kördi.
Şu sebepten Portugaliya Tış işler nazirligine Rusiye işleri müdirini Lissabonda çağırdılar. Portugaliya Tış işler naziri Paulo Ranjel Rusiye akimiyetiniñ areketleri qabul etilmez olğanını bildirdi. «Rusiye Federatsiyası tarafından Ukrayinağa ve Kyiv şeerine yapılğan er bir ücüm bizim takbihimizge muhtac. Amma ücümlerniñ diplomatik obyektlerge yönelgeni iç qabul etilemez», – dedi o.
Bir binada bir qaç diplomatik obyekt yerleşe, dedi nazir. Onıñ aytqanına köre, zararlar az olğan, bazı odalarda pencereler sınğan, qapular zarar körgen.
Dekabrniñ 20-nde saba Rusiye ordusı Kyivge raketalarnen ücüm etti. Şeerniñ bir qaç rayonında patlavlar oldı. Hususan, Golosiyıvskıy rayonında qızdıruv magistrali zarar kördi, şu sebepten 630 mesken ev qızdıruvsız qaldı.
BBC Kyiv mühbiri Dmıtro Vlasovnıñ aytqanına köre, Mıkolayıvskıy köstel, ofis binaları, HolidayInn musafirhanesi ve mesken kompleks zarar körgenler.
Mudafaa nazirligi Rostov vilâyetindeki «Kombinat Kamenskiy» müessisesine qarşı ücümge cevap oldı. Müessise beyanatına köre, «Ukrayina telükesizlik hızmetiniñ idare noqtasına» ve Kyivdeki «Luç» konstruktor bürosına qarşı darbeler endirildi. «Darbe maqsadlarına irişildi. Bütün obyektlerge ücüm etildi», – dep aytıla haberde.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
