Kyivde noyabrniñ 8-nde «Ukrainağa qarşı silâlı istilâ neticesinde azatlıqtan marum etilgen şahıslarnıñ içtimaiy ve uquqiy imayesine dair» Ukraina Qanunınıñ leyhası taqdim etildi ve muzakere etildi, dep bildire Qırım.Aqiqat mühbiri.
«Rusiyeniñ Ukrainağa qarşı silâlı istilâsı neticesinde azatlıqtan marum etilgen şahıslar içün müim olğan metinni ve qaydlarnı taqdim etemiz. Bu tuvğanlarını çoqtan körmegen qorantaları içün müim… Mence, bu qoyulğan suallerge cevap bergen keyfiyetli bir metin. Niayet, devlet yardımını, devlet destegini, içtimaiy ve uquqiy imaye alacaq şahıslarnıñ üç kategoriyasını belgilemekte – bu şahıslar siyasiy sebeplerden azatlıqtan marum etildi, vatandaş reineleri ve cenk esirleri», – dedi qanun leyhası aqqında Ukraina prezidentiniñ Qırım Muhtar Cumhuriyetindeki daimiy vekili Anton Korınevıç.
Onıñ aytqanına köre, bu qanun leyhası işğal altındaki yarımadağa kerek.
«Bu mesele Qırım Muhtar Cumhuriyeti ve Aqyar şeeri içün ayrıca müim, çünki bilesiñiz: bugünde-bugün 90 siyasiy mabüsimiz bar. Ekseriyeti – qırımlılar, çoqusı – qırımtatarlardır», – dep qayd etti Korınevıç.
Veteran, vaqtınca işğal etilgen topraqlar ve memleket içinde köçip kelgen şahıslarnıñ işleri naziri Oksana Kolâda Yuqarı Rada bu qanun leyhasını tez vaqıtta tasdıqlar, dep ümüt etkenini bildirdi.
«Prezident Ofisiniñ vekilleri, Ukraina prezidentiniñ Qırımdaki temsilcilik vekilleri, ekspertler, halqara teşkilâtlar, ortaqlarımıznen bir qararğa keldik, bu qanun leyhasını azırlamaq kerekmiz, taqdim etemiz… 100% bilem ki, Prezident ofisi prezidentke bu qanun leyhasını acele olaraq kirsetmege teklif etecek», – dedi Kolâda.
Ukraina aq qorçalayıcıları, faal ve qırımlı advokatlar onı «mükemmelleştirmek içün» kerekli tüzetüvler kirsetmege çağırdı.
Ukraina Yuqarı Radasınıñ insan aqları vekâletlisi Lüdmila Denisova, Rusiye «115 ukrainalını yalan ve siyasiy sebeplerge esaslanğan qabaatlar boyunca qanunsız şekilde taqip ete», dep bildirdi. Onıñ malümatına köre, 40 qırımtatarı Rusiyede azatlıqtan marum etüv yerlerinde buluna, 32 kişi vaqtınca işğal etilgen Qırımda apiste yata, cezadan şartlı olaraq azat etilgen 15 insan Qırım yarımadasında yaşağan yerinde buluna.
Sentâbrniñ 7-nde Ukraina ve Rusiye tutulğan şahıslarnı almaştırdı. 35 ukrainalı olğan uçaq «Borıspil» ava limanında qondı.
Ukraina prezidenti Volodımır Zelenskıynıñ Qırım.Aqiqatqa bildirgenine köre, qırımtatar faalleriniñ Rusiye apishanelerinden azat etilüvi Ukraina-Rusiye deñişiminiñ ekinci basamağı olacaq.
