Cumaaqşamı künü, mayısnıñ 21-nde, saat 13:00-da «KrımSOS» aq qorçalayıcı teşkilâtınıñ Facebook saifesinde «Qırım birdemligi» cemaat birleşmesiniñ koordinatorından biri, Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ Aqmescit SİZOsında bulunğanda yazğan kitabı taqdim etilecek.
Qayd etilgenine köre, kitapnıñ adı «Kamera altındaki kamerada yaşayış. Server Mustafayevniñ kündeligidir».
Taqdim merasimi Server tutulğanınıñ yılında olacaq. Bir yıl evelsi – mayısnıñ 21-nde – Mustafayevniñ evine Rusiye FSBsi tintüvnen keldi.
«Server Mustafayevniñ evinde apayı ve dört balası qaldı. Apiske alınğanda kiçik qızı Naciye 2 aylıq edi… Serverniñ tutuluvı faal zorbalıqsız aq qorçalayıcı faaliyeti, Rusiye uquq qoruyıcı organları ve akimiyetini tenqit etkeninen bağlı. Siyasiy mabüs «Qırım birdemligi» cemaat areketiniñ faaliyetinde faal iştirak etti. Bu birleşme Rusiye akimiyeti tarafından taqip etilgen qırımtatarlar ve musulmanlar ve olarnıñ qorantalarına uquqiy, informatsion ve maddiy yardım köstere», – dep aytıla «KrımSOS» haberinde.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Memorial» Rusiye aq qorçalayıcı merkezi Server Mustafayevni siyasiy mabüs olaraq tanıdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
