Kremlniñ eski siyasiy mabüsi, qırımlı ukrain rejissöri Oleg Sentsov, Veteran Public Talk Kyiv hubında dekabr 10-unda Donbass veteranları, sabıq siyasiy mabüsler ve Rusiyede apis etilgen ukrainlerniñ tuvğanlarınen "samimiy subet"ni keçirecek.
"Rusiye türmesinde beş yıl, 145 künlük açlıq narazılığı, mefadan vazgeçüv, evge qaytuv, faal halqara cemaatçılıq işi ve öz populârlığına soñsuz istiza. Bu ve başqa mevzularnı musafirimiznen muzakere etecekmiz. Veteranlarnı, arbiy adamlarnı, sabıq siyasiy mabüslerni ve esirlerniñ tuvğanlarını davet etemiz", - denile merasimnıñ ilânında.
Teşkilciler, Sentsovnen körüşüvde iştirak etmege istegenlerni, dekabr 8-ine qadar qayd etilmege rica ete.
Qırımlı rejissör Oleg Sentsov ve anarhist Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
Oleg Sentsov Rusiye şimalindeki Labıtnangi şeerinde apiste yatqan edi. Aleksandar Kolçenko ise Uraldaki Kopeysk şeeriniñ koloniyasında bulunğan edi.
Keçken sene Rusiye apishanelerinde tutulğan bütün ukrainalı siyasiy mabüslerni azat etmek talabı ile tutqan 145 künlik açlıqtan soñ Oleg Sentsov «aşamağa yazma şekilde razı oldı». O, bunı «zornen aşatuv telükesi bar olğanından mecburiy adım» dep adlandırdı. Amnesty International zornen aşatuv işkence ola, dep bildirdi. 2018 senesi oktâbrniñ 25-nde Sentsovğa Avropa parlamentiniñ «İfade serbestligi» içün Saharov mukâfatı berildi.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
2019 senesi sentâbrniñ 7-nde Sentsov ve Kolçenko Rusiye apishanesinden büyük deñişim neticesinde azat etilgen ediler.
