Kyivde Rusiyeniñ gece darbesi neticesinde dört insan elâk oldı, 19 kişi yaralandı, 14-ü hastahanege alındı; mesken evler ve infrastruktura obyektleri zarar kördi, dep bildirdi şeer yolbaşçısı Vitaliy Klıçko.
"Elâk olğanlar arasında – bir tibbiyet hadimi. Dört tibbiyet hadimi yaralandı. Kritik infrastruktura zarar kördi. Bazı rayonlarda elektrik ve suv problemleri bar", – dep yazdı Klıçko yanvarniñ 9-da Telegramda.
Onıñ aytqanına köre, uçucısız ve parçalarınıñ tüşmesi ve neticesinde çıqqan yanğınlar Darnıtskıy, Desnânskıy, Dniprovskıy, Peçerskıy ve Şevçenkivskıy rayonlarında qayd etildi.
"Darnıtskıy rayonında mesken evniñ azbarına uçucısız tüşti. Yanındaki bir qatlı tükân ve doquz qatlı mesken evniñ camları qısmen zarar körddi. Uçucısız parçalarınıñ tüşmesi neticesinde eki mesken ev ve garajlarda yanğın çıqtı", – dep aytıla haberde.
Şeer yolbaşçısı haber etkenine köre, Desnânskıy rayonında 18 qatlı mesken evniñ damına uçucısıznıñ ücüm etmesi neticesinde yanğın çıqtı. 5 qatlı mesken evde yanğın çıqtı, daa bir beş qatlı evde ise kiriş tuman toldı. Bundan ğayrı, Desnânskıy rayonında alış-veriş merkezi ve şifahane yeri zarar kördiler.
"Dniprovskıy rayonında uçucısız parçaları bir qatlı mesken olmağan binanıñ damına tüşti. Uçucısız parçalarınıñ tüşmesi neticesinde 16 qatlı ve doquz qatlı mesken evlerde yanğın çıqtı. Patlav dalğası üç qatlı mesken evniñ damını yoq etti. Bundan ğayrı, Dniprovskıy rayonında parçalar mesken evniñ azbarındaki bala meydançığına ve tramvay deposına tüşti", – dep qoştı Klıçko.
Peçerskıy rayonında, onıñ aytqanına köre, uçucısız parçalarınıñ tüşmesi neticesinde doquz qatlı mesken evniñ fasadı qısmen bozuldı ve mesken olmağan çoq qatlı bina zarar kördi, Şevçenkivskıy rayonında ise uçucısıznıñ mesken binağa tüşmesi neticesinde yanğın çıqtı.
Kyiv şeer devlet memuriyeti haber etkenine köre, Rusiyeniñ Kyivdeki kritik infrastruktura obyektlerine açqan ateşi neticesinde qızdıruv problemleri de başladı.
"Al-azırda Desnânskıy, Peçerskıy rayonlarında, Ğolosiyıvskıy, Darnıtskıy, Dniprovskıy, Obolonskıy, Podilskıy, Solomenskıy ve Şevçenkivskıy rayonlarınıñ bazı yerlerinde qızdıruv ya yoq, ya da az berile", – dep aytıla haberde.
Kyiv vilâyetiniñ şeer memuriyeti qayd etkenine köre, Kyivdeki zor bir energetik vaziyet sebebinden metro trenleri "qırmızı" hatta deñişmeli areket ete, "Dnipro" – "Lisna" stantsiyaları arasında açıq yerde elektrikler olmağanı içün tren areketi toqtatıldı.
Ukrayina Silâlı quvetleriniñ Ava küçleri gece bildirgenine köre, Rusiye ordusı Kyivge darbe dronları, qanatlı ve ballistik raketalarnen ücüm etti, şeerde patlavlar eşitildi.
Ukrayina prezidenti Volodımır Zelenskıy ve ABD Ukrayina elçihanesi tünevin Rusiyeniñ ava darbesiniñ yüksek telükesi aqqında tenbilegen ediler.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
