Link açıqlığı

Saatnıñ esas haberi

«Özüne sadıq qalmaq – cinayet degildir»: Kyivde Rusiye tarafından taqip etilgen qırımtatarlar aqqında fotoresimler sergisi açıldı (fotoresimler)

Kyivde Ukraina Tış işler nazirliginiñ binasında işğalden soñ Qırımda Rusiye tarafından taqip etilgen qırımtatarlar ve musulmanlar aqqında fotoresimler sergisi açıldı. Bu leyha teşebbüsi Ukraina Tış işler naziriniñ birinci muavini Emine Cepparğa ait.

Foto leyhası Ukraina ve halqara aq qorçalayıcıları siyasiy mabüs dep sayğan Kremlniñ qırımlı reineleriniñ süretlerinen ve apiske alınğan ve mahküm etilgen qırımlılarnıñ bala ikâyelerinen taqdim etildi.

«Özüne sadıq qalmaq – cinayet degildir. Bu müim, çünki Qırımda Ukraina vatandaşlarınıñ taqip etilüvi milliy ve diniy mensüplik sebebinden ola», – dep qayd etti leyha müellifi Emine Ceppar.

Tedbirde Qırımtatar Milliy Meclisiniñ vekilleri, «Qırım eviniñ» müdiri, Ukraina Tış işler nazirliginiñ vekilleri ve «Qırım balalığınıñ» koordinatorı iştirak etti.

Ukraina Tış işler naziri Dmıtro Kuleba, kelgen çetel eyyetleri Ukraina Tış işler nazirligine kelip, koridorda bala yüzlerini körecek ve Qırımda ukrainalı mabüslerniñ problemi ne qadar büyük olğanını añlaycağı içün pek müimdir, dep qayd etti.

2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.

Qırım aq qorçalayıcı gruppasınıñ malümatına köre, 2020 senesi oktâbr ayınıñ soñuna qadar eñ az 110 insan siyasiy ya da diniy sebepli cinaiy taqipler çerçivesinde azatlıqtan marum etildi.

Ukraina Yuqarı Radasınıñ insan aqları vekâletlisi Lüdmila Denisovanıñ kâtibiyeti, 2020 senesi noyabr ayına qadar Rusiyede siyasiy sebeplerden taqip etilgen Ukraina vatandaşlarınıñ sayısı 130 kişi ola, dep bildirdi.


Facebook Forum

XS
SM
MD
LG