Mayıs 27-sinde Kyivde Rusiye elçiligi yanında Find&Free kampaniyası çerçivesinde “Ervinsiz üç yıl” aktsiyası keçirildi. O, üç yıl evel, 2016 senesi Qırımda hırsızlanğan Ervin İbragimovğa bağışlanğan, dep bildire Qırım.Aqiqat mühbiri.
“Onıñ davası boyunca tahqiqat yapılmağanını açıq-aydın körüne.Alâ daa İbragimov aqqında bir şey belli degil. 2017 senesi dava toqtatılğan edi. 2018 senesi mayıs ayında advokat Emil Kurtbedinov, dava tahqiq etilmegeni içün Qırımnıñ Rusiye mahkemesine şikâyet yazdı. Amma bu vesiqalarnı mahkeme red etti. 2017 senesi mayıs ayından tahqiqat tarafından iç bir areketler yapılmadı”, - dedi aktsiyada “KrımSOS” cemaat teşebbüsiniñ başı Tamila Taşeva.
Onıñ aytqanına köre, rusiye tahqiqatı, 5 yıl evel, 2014 senesi mayıs 26-sında ğayıp olğan Ukraina tarafdarı olğan faal Timur Şaymardanovnıñ davası da tahqiq etilmey.
Bun endi 35-inde er aylıq aktsiya.
Bağçasarayda 2016 senesi mayısnıñ 24-nde aqşam şeer şurasınıñ deputatı, Dünya Qırımtatar Kongressi icra komitetiniñ azası Ervin İbragimov hırsızlanğan edi. Onıñ maşinası yol ortasında tapıldı. Ğayıp olğan kişi mayısnıñ 25-nde Meclis azalarınen beraber Sudaqqa baracaq edi, anda qırımtatar faalleriniñ mahkemesi planlaştırılğan edi.
Qırımtatar faali Nariman Celâl tutulğanını video nezareti kameraları qayd etti, dep bildirdi. Video uquq qoruyıcı organlarına berildi.
«Videoda, onı körgenlerniñ aytqanlarına köre, yol patrul hızmetiniñ urbasında insanlar bar, olar Ervin İbragimovnı toqtatıp, maşinadan alalar ve diger avtobusqa mindireler, ondan soñ ise keteler», – dep aytqan edi Celâl 2016 senesi.
Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.
Qırım Muhtar Cumhuriyetiniñ prokuraturası Ervin İbragimovnıñ ğayıp olmasınen bağlı mahkemeden evel tahqiqat keçirmekte.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Faallerniñ malümatına köre, Rusiyeniñ Qırım işğalinden soñ 44 qırımlı ğayıp oldı, 15 kişi alâ daa tapılmadı.
