Radio Svoboda mühbiriniñ bildirgenine köre, Kyivde Rusiye elçihanesi yanında maşina ateşke berildi. Anda veteranlar ve faaller Rusiyeniñ Qara deñizde yapqan istilâ sebebinden narazılıq aktsiyasını keçire edi.
Maşinanıñ nomerası 001 raqamlarınen başlana, Rusiye elçihanesine aittir. Maşina elçihanege yaqın, Yaroslav Homov aralığında, tura edi.
Noyabrniñ 25-nde aqşam Kyivde Rusiyeniñ Ukraina elçihanesi ögünde narazılıq aktsiyası başladı. Bunıñ sebebi Qara deñizde FSB tarafından ukrainalılarğa açılğan ateş oldı. Aktsiya iştirakçileri ketirgen şinalarnı yaqmağa tırıştı. Elçihane ögünde faaller ve şinalarnı ateşke bermege mania olğan uquq qoruyıcılar arasında qavğa oldı.
Bundan evel Ukraina prezidentiniñ Qırım Muhtar Cumhuriyetindeki daimiy temsilcisi Boris Babin bildirdi ki, FSB Keriç boğazında Ukraina gemilerine qarşı silâ qullandı. Soñki malümatqa köre, FSB açqan ateş neticesinde altı Ukraina deñizcisi yaralandı.
Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Ukraina milliy telükesizlik ve mudafaa şurasınıñ kâtibi Oleksandr Turçınov MTMD toplaşuvında Ukrainada cenk vaziyetini 60 künge ilân etmege teklif etti.
Noyabrniñ 25-nde saba Ukraina Arbiy deñiz quvetleri bildirdi ki, Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra Rusiye Keriç boğazını vatandaş gemileriniñ keçmesi içün qapattı. Aynı vaqıtta, Rusiye üç gemisini Keriç boğazından yiberdi, amma Ukraina gemileriniñ Azaq deñizine keçişini blok etmege devam etti.
Ukraina Tış işler nazirligi Rusiyeniñ noyabrniñ 25-nde Qara ve Azaq deñizlerinde yapqanlarını tenqit etti.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
