Kyivde qırımtatar uçucısı, Sovetler Birliginiñ eki defa qaramanı Amet-Han Sultannıñ doğğanına 99 yıl tolğanını qayd etecekler. Bu aqta Qırımtatar Milliy Meclisiniñ reisi Refat Çubarov bildire.
«2019 senesi oktâbrniñ 25-nde saat 16:00-da Kyivdeki Ebediy Şan-Şüret Parkında qırımtatar halqınıñ ulu oğlu, Sovetler Birliginiñ eki defa qaramanı, sınav uçucısı, qırımtatar milliy areketiniñ faal iştirakçisi Amet-Han Sultannıñ abidesine çeçekler qoyulacaq», – dep yazdı o, Facebook saifesinde.
Tedbirde Qırımtatar Milliy Meclisiniñ vekilleri, Ukraina devlet ve cemaat erbapları iştirak etecekler.
Aqmescitte şeerniñ Rusiye akimiyeti de uçucı doğğanınıñ 99 yılına bağışlanğan hatıra tedbiri keçirmege planlaştıra.
Tedbir programmasında dua, hatıra mitingi olacaq, yarımada akimiyetiniñ vekilleri çıqışta bulunacaq.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (doğma Dağıstandaki Tsovkra-1 avulından), anası – qırımtatarı. Em dağıstanlılar, em qırımtatarlar Amet-Han Sultannı milliy qaramanları dep sayalar. Amet-Han Sultan 603 cenk uçuşını kerçekleştirip, natsist Almaniyanıñ ava quvetlerine ait 30 uçaqnı şahsen ve 19 danesini taqım erkânında urıp tüşürdi. Uçucı 100 çeşit uçquçnıñ qullanuvını ögrendi, onıñ ücümleri 4237 saatnı teşkil etti. Amet-Han Sultan Tu-16 adlı uçqan laboratoriyada sınav uçuşını kerçekleştirgende elâk oldı. Moskvadaki Novodeviçye mezarlığında defin etildi. 2015 senesi mayısnıñ 14-nde Ukraina Yuqarı Radası «Aqmescit» ava limanına Amet-Han Sultan adını berdi. Onıñ adını Mahaçkala (Dağıstan, Rusiye) ava limanı da taşımaqta.
