Kyivdeki «Qırım evinde» dekabrniñ 10-nda Birleşken Milletlerniñ aq qorçalayıcılarnı qoruv deklaratsiyasınıñ 20 yılı munasebetinen faaliyeti sebebinden Qırımnı terk etmege mecbur olğan qırımlılarnıñ eşyaları numayış etilgen «Aq qorçalayıcılarnıñ cemidanları» sergi leyhası taqdim etildi.
Teşkilâtçılarnıñ malümatına köre, sergide faaliyetleri sebebinden ayatlarını telükeden qurtarğan Ukraina şarqı, Azerbaycan, Beyazrusiye faalleri ve aq qorçalayıcılarınıñ eşyaları ile cemidanları numayış etildi.
Sergi kerçek faal ve aq qorçalayıcılarnıñ şahsiy eşyaları ile yedi «cemidandan» ibaret. Teşkilâtçılarnıñ ğayesine köre, cemidanlar içinde olğan eşyalar seyircilerge zemaneviy aq qorçalayıcı sımasını tasavvur etmege yardım etmeli.
Sergi «Qırım evinde» dekabrniñ 14-ne qadar devam etecek.
Kreml kontrolindeki Aqmescitniñ Kiyev rayon mahkemesi dekabrniñ 7-nde qırımlı advokat Emil Kurbedinovnı 5 künge tevqif etti. Onı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden apiske aldılar. Kurbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
