Kyivde avgustnıñ 30-nda Mecburiy ğayıp olmalarnıñ qurbanları kününde «15 hırsızlanğan ömür» adlı sergi açıldı.
Sergini Ukraina TİN ve «QırımSOS» cemaat teşkilâtı teşkil etti.
«2014 senesinden başlap, endi sekiz yıldan berli, Mecburiy ğayıp olmalarnıñ qurbanları halqara künü biz içün pey ağır bir kündir, çünki Ukrainanıñ RF tarafından işğal etilgen Qırım MC ve Aqyar şeerinde ve Donbasta bir çoq vatandaşımız bellisiz ğayıp olğan kibi sayıla. Mecburiy ğayıp olğalarnıñ arqasında konkret bir insannıñ ikâyesi, tuavğanlarınıñ ve yaqınlarınıñ çekişmeleridir», – dedi Emine Ceppar.
Qayd etilgeni kibi, "15 hırsızlanğan ömür" adlı sergi, taqdiri aqqında alâ daa iç bir şey belli olmağan Qırımlılarnıñ portretleri ve ikâyelerinden ibaret: Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.
Emine Ceppar qayd etti ki, Ukraina halqara ortaqları ile temasta olğanda işğal etilgen Qırımda mecburiy ğayıp olmalarnıñ qurbanları aqqında daima hatırlata.
«Muvaqqat işğal etilgen Qırım ve Donbas topraqlarında mecburiy ğayıp olmalar Rusiye işğaliniñ eñ ağır aqibetlerinden ve eñ ağır cinayetlerinden biridir. Ukraina TİN taqımı Dmıtro Kuleba aşlığında Rusiyeni mesüliyetke celp etmek içün çalışmağa devam etecek», – dedi o.
İyülniñ 26-nda QırımSOS cemaat teşkilâtınıñ faalleri Kyivdeki Rusiye elçiligi yanında işğal etilgen Qırımda mecburiy ğayıp olğanlarnıñ ve olarnıñ tuvğanlarınıñ destegine 60-ncı aktsiya keçirdiler - «Ne vaqıt qaytacaqsız...».
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Prezidentniñ Qırımdaki temsilciligi bir haber alınmağan ğayıp olğan qırımlılarnıñ cedvelini de derc etti: Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
