Kyivde martnıñ 7-nde yarımadanıñ Rusiyeniñ işğalinden evelki ve soñraki vaziyeti aqqında ikâye etken «Qırım perde arqasında. İşğal alanınıñ qılavuzı» kitabı taqdim etildi.
«Qırım perde arqasında» qılavuzı Qırım meselesiniñ müim tarihiy, içtimaiy ve siyasiy incelikleri aqqında tarif eter, Rusiyeniñ Ukrainağa qarşı cenkiniñ qara perdesini açar. Dünya bilmeli!», – dep aytıla kitapnıñ anonsında.
Müellifleriniñ qayd etkenine köre, neşirde Qırımnıñ işğali ve askeriyleştirilüvi aqqında hususiy malümat mevcut.
«Qırım işğaliniñ beşinci yılında Ukrainanıñ yapqanlarına ve yapacaqlarına yekün çekemiz. Amma bu işğalniñ aqibetleri bar, olarnı er kün qayd etemiz. Bu em repressiyalar, em siyasiy sebepten uydurılğan davalar, insan hırsızlanuvı, eziyetlev, maneviy azaplar…Qırım ile cenk olmağanına baqmadan, kögnitiv cenk, kerçek cenk bar. Çeşit gibrid şekillerinen resurs qoyula, «Qırımbizim» tezisi farqlı delillernen isbatlana. Ukraina içün öz delillerini tapmaq ğayet müim. Bu kitapnıñ taqdimi – kerçegimizniñ qutusına «+1», – dep ayttı Ukraina informatsion siyaseti naziriniñ birinci muavini Emine Ceppar.
Ukraina Tış işler naziri Pavlo Klimkin bugünde-bugün halqara toplulıq Qırım aqqında tolu malümatqa irişemey ve anda olğanlarnı añlamay, dep qayd etti.
Yañı kitap sayesinde, onıñ fikirince, çeteldeki biñlernen insan Qırımnıñ «diger bilgisini ve isini» elde ete bile.
«Er bölükni oqumağa kerekmey. Amma onı qoluna alğan er kes meraqlı bir şey tapar. Qırım nedir? Anda ne ola? Rusiye ne yapa? Çünki er kes bir şey eşitti, bir şey kördi. Muntazam sürette bir şey barmı?», – dep qayd etti Klimkin.
Qılavuz «Donbas ateşte. Zıddiyet alanınıñ qılavuzı» kitabı başlatqan telükesizlikniñ körünmegen alanları aqqında zıncırnı devam ettire.
Kitap beş tilde çıqa: inglizce, almanca, rusça, türkçe ve ukraince.
Kitap bedava berilecek: em basılacaq, em elektron formatında.
