Oktâbrniñ 17-nde Kyivniñ Gulliver alış-veriş merkezinde bala ve büyükler içün «Qırımnıñ elifbesi» sergisi başlanacaq. Elifbe eki tilde taqdim etilecek – ukrayince ve qırımtatarca.
Ğayege köre, elifbeniñ er bir arfi yarımada ve tamır halqlarınıñ medeniy çeşitliligi aqqında tarif etecek.
«Biz vaqtınca işğal etilgen yarımadağa, Qırımnıñ tarihı ve tamır halqlarınıñ medeniyetine büyük diqqat celp etmege tırışamız. «Qırım – Ukrayina» olğanını er keske hatırlatmaq! Bu leyha yarımada işğalinden soñ doğğan balalar içün daa müim», – dep qayd etti leyha müellifi İrına Taranenko.
Taqdim merasimi çerçivesinde Qırımnıñ tamır halqlarınıñ medeniyetini añlavğa bağışlanğan munaqaşa paneli olacaq. Qırımtatar cemaatınıñ vekilleri, cemaat erbapları ve faaller çıqışta bulunacaq:
- Qırımtatar Milliy Meclisiniñ reisi Refat Çubarov
- Qırımtatar kimligi leyhalarınıñ reberi Mavile Halil
- «Kitap – seyahattır» leyhasınıñ medeniy reberi Sabina Ablâyeva
- 1+1 media prodüseri ve «Kerçek tarih» leyhasınıñ temelcisi Akim Galimov
- cemaat erbabı Leviza Celâlova
- Qırımtatar Resurs Merkeziniñ idare reisi Eskender Bariyev
Tedbir oktâbrniñ 17-nde saat 16:00-da Gulliver alış-veriş merkezinde (Kyiv ş., Sportıvna ploşça, 1a). Kiriş serbest.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
