Ukrayina prezidentiniñ Qırım Muhtar Cumhuriyetindeki daimiy vekiliniñ muavini Denis Çistikov qayd etkenine köre, «Qırım studiyaları» merkezi tek akademik saada degil de, Qırım mevzusınen bağlı olğan, Qırım yarımadasınıñ tarihı, dini, medeniyetini ögrengen ve populârlaştırğan, diplomatiya ya da siyaset saasında çalışqanlar içün müim bir teşebbüs ola.
Çistikov, böyle tasil-tedqiqat leyhaları Temsilcilik kibi devlet müessiselerine işğalden azat etüv ve vaqtınca işğal etilgen yarımadanıñ reintegratsiyasınen bağlı strategik vesiqalarnı azırlamağa yardım ete, dep bildirdi.
«Qırım studiyaları» merkeziniñ açılışında Büyük Britaniyanıñ Ukrayina elçisi Martin Harris Qırımnıñ medeniy mirasını saqlamaq ve tarihını ögrenmek müim olğanını qayd etti.
«Büyük Britaniya Ukrayina içün bu hususiy leyhağa qoltutmaq imkânına quvana. O, studentler içün qadimiy tarihiy, yarımadanıñ zengin medeniyeti ve qırımtatarlarnıñ pek meraqlı tilini aça. Britaniya ükümetiniñ fikri deñişmey: Qırım – Ukrayinadır», – dep qayd etti Martin Harris.
«Kyiv-Moğıla akademiyası» Milliy universitetiniñ prezidenti Serğiy Kvit tek tarihiy meselelerni degil, zemaneviy ve yarımadanıñ kelecek istiqballerini tedqiq etmek kerek, dep qayd etti. Serğiy Kvit qırımtatar medeniyeti ve tiline de diqqat ayırıp, olarnıñ inkişafı merkezniñ em universitet içinde, em tışında merkez faaliyetiniñ müim bir yönelişi olacaq, dep ayttı.
«Qırım studiyaları» merkeziniñ reberi, tarihçı ve tedqiqatçı Martin-Aleksandr Kislıy Kyiv-Moğıla akademiyası böyle teşebbüs içün mükemmel bir yer ola, dep qayd etti. Onıñ aytqanına köre, merkez tek qırımtatar tarihı ve medeniyetini tedqiq etmek içün bir platforma degil, postkolonializm tedqiqatı ve zemaneviy Rusiyeniñ istilâcı memleket olaraq talili içün müim bir meydan ola.
«Qırım studiyaları» merkeziniñ açılışı vaqtında Garvard ve Albert universitetleriniñ alimlerinden hayırlav sözleri oldı.
Daa evel berilgen malümatqa köre, yanvarniñ 27-nden fevralniñ 1-ne qadar «Kyiv-Moğıla akademiyası» Milliy universitetinde «Qırım studiyaları» İlk Qış Mektebi çalışacaq.
Kanadadaki Albert universiteti Kanada ukrayin studiyaları institutı çerçivesinde areket etken milliy tedqiqatlar fakultetinde qırımtatar studiyaları stipendiya programmasını qurdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.