Ukrayına PENi Ukrayına prezidentiniñ Qırım Muhtar Cumhuriyetindeki temsilciliginen beraber Qırım işğaline tirenüv künü munasebetinen «Birdemlik sanatı» aktsiyasını başlatalar. O, Qırımda Rusiye akimiyeti tarafından qanunsız apiske alınğan jurnalist ve faallerge bağışlanacaq.
Tedbirde ukrayınalı yazıcı, ressam, yırcı ve jurnalistler Alim Aliyev, Nariman Aliyev, Mıroslava Barçuk, Volodımır Yermolenko, Alevtina Kahidze, Andriy Kurkov, Ruslana Lıjiçko, Yuriy Makarov, Mıroslav Marınovıç, Vitaliy Portnikov, İrına Slavınska ve başqaları iştirak etecek.
Bundan ğayrı, aktsiya çerçivesinde qırımlı siyasiy mabüslerge bağışlanğan işlerniñ sergisi açılacaq. Olarnı ukrayınalı ressamlar Alenka Galay, Darya Golovnina, Ölena Kainska, Alevtina Kahidze, Katerına Közinska, Vartan Markaryan, Zirka Savka, Rustem Skibin ve Artem Yasinskiy bu aktsiyağa mahsus azırladı. Sergiy PENde 2023 senesi martnıñ 27-ne qadar devam etecek. Taqdim etilgen eserler hayriye mezatında satılacaq, para «Sağ qayt» fonduna berilecek.
Aktsiyanıñ başlanması fevralniñ 27-nde saat 18:30-da PEN yerinde (Kyiv, Lukyavnivska soq., 14a) planlaştırıla.
Bıltır dekabr ayında Ukrayına prezidentiniñ Qırım Muhtar Cumhuriyetindeki temsilcisi Qırımda yarımadada ya da Rusiyede tutulğan eñ az 155 Ukrayına vatandaşı mahküm etildi, dep bildirgen edi. 109-ı – qırımtatarıdır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye işğaline qarşı tirenüv künü
Fevralniñ 26-nda cemaatçılıqnen teşebbüsinen Qırımnıñ Rusiye tarafından işğal etilüvine qarşı tirenüv künü qayd etile. Ukraina ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
2014 senesi fevralniñ 26-nda Qırım Muhtar Cumhuriyeti Yuqarı Şurasınıñ binası ögünde Ukraina topraq bütünligine qoltutuv mitingi olıp keçti. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında aralarında Ahtem Çiygoz ve Rustem Umerov olğan Ukraina Yuqarı Radasınıñ deputatları Ukraina prezidenti Volodımır Zelenskıyge muracaat etip, Qırımnıñ Rusiye işğaline qarşı tirenüv kününi devlet seviyesinde resmiy şekilde pekitmege rica etti.
