Dekabrniñ 9-nda Kyivdeki Yaroslav Mudrıy Milliy kütüphanesinde qırımtatar yazıcısı, «Qırım ailesi» cemaat teşkilâtınıñ azası Bekir Ablayevniñ «Telâşlı zamanlar» («Trevojnıye vremena» – QA) kitabı taqdim etilecek.
Merasim saat 14:30-da başlacaq, dep bildire teşkilâtçıları. Tedbirge Türkiye Cumhuriyetiniñ Ukraina elçisi Yönet Can Tezel, diplomatik elçihanelerniñ vekilleri, qırımtatar halqınıñ liderleri, Ukraina halq deputatları Mustafa Cemilev ve Refat Çubarov davet etildi.
Bekir Ablayev – «Qırım ailesi» medeniyet merkeziniñ talebelerine Qırım tarihı derslerini bere, o, altı kitapnıñ müellifi ola: «Priklüçeniya Timki», «Rasskazı moyego deda», «Neveroyatnıye priklüçeniya Hayserçika», «Glotok çistogo vozduha», «Jdi menâ, more!» ve «Trevojnıye vremena». Soñki kitabı Qırım ve qırımtatarlar, qırımtatar halqınıñ sürgünligi, ğurbetlik yılları ve qırımtatarlarnıñ tarihiy vatanlarına avdeti aqqında ikâye ve esselerni topladı.
Daa evel haber etilgeni kibi, Kyivde dekabrniñ 8-nda Aleksandr Mimruknıñ «Oleg Sentsov» kitabınıñ inglizce tercimesi taqdim etilecek.
