Kyivde cumaaqşamı künü, oktâbrniñ 25-nde, Daimiy Şan-Şüret parkında Sovetler Birliginiñ eki defa qaramanı, sınav uçucısı, qırımtatar milliy areketiniñ faal iştirakçisi Amet-Han Sultannıñ abidesine çeçekler qoyulacaq.
Qırımtatar Milliy Meclisiniñ matbuat hızmeti bildire ki, işbu tedbir uçucınıñ doğğan kününden 98 yılına bağışlana.
Merasimde Qırımtatar Milliy Meclisiniñ vekilleri, Ukraina devlet ve cemaat erbapları iştirak etecek. Tedbir iştirakçilerini Ukraina devlet bayrağını ve qırımtatar milliy bayrağını almağa çağıralar. İştirakçiler Daimiy Şan-Şüret parkınıñ merkeziy kirişinde toplaşacaq.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (Dağıstandaki Tsovkra-1 avulından), anası – qırımtatarı. Amet-Hannı em Dağıstanda, em qırımtatarlar arasında milliy qaraman dep bileler. Amet-Han Sultan 603 cenkâver uçuşnı kerçekleştirdi, şahsen 30 ve gruppa erkânında natsist Almaniyanıñ ava quvetleriniñ 19 uçağını tüşürdi. Uçucı 100 çeşit uçuş apparatını sınadı, onıñ ücümi 4237 saat teşkil etti.
Amet-Han Sultan Tu-16 uçqan laboratoriyada sınav uçuşını eda etkende elâk oldı. Moskvadaki Novodeviçye mezarlığında defin etildi. Mahaçkala ve Aqmescit ava limanlarına onıñ adı berilgen edi.
