Kyivdeki Yaroslav Mudrıy Milliy kütüphanesinde (parlament kütüphanesi) mayısnıñ 12-nde qırımtatar halqı genotsidi qurbanlarınıñ hatırasına bağışlanğan tedbirler keçirilecek.
Bu aqta teşkilâtçılardan biri olğan «Qırım ailesi» teşkilâtınıñ Facebook saifesinde haber etile.
Qayd etilgenine köre, 2014 senesi Rusiyeniñ Qırım işğalinden soñ tutulğan siyasiy mabüslerniñ qoranta azalarınıñ foto sergisi, qırımtatar timsallerinen hatıralıq mallarınıñ hayriye aktsiyası, bala işleri, resimleriniñ yarmalığı ötkerilecek. Aktsiyada toplanğan para işğal altındaki Qırımğa siyasiy mabüslerniñ qorantalarına berilecek.
Aktsiyanı Qırımtatar Milliy Meclisi, Yaroslav Mudrıy Milliy kütüphanesi, Ukraina prezidentiniñ qırımtatar halqı işlerinden vekâletlisiniñ apparatı, Vaqtınca işğal etilgen Ukraina topraqlarınıñ meseleleri nazirligi ve İslâm medeniyet merkezi teşkil eteler.
Mayısnıñ 18-nde Ukraina ve dünyada qırımtatar halqınıñ 1944 senesi Qırımdan sürgün etilüviniñ qurbanları añılmaqta. Şu künü qırımtatarlar tolu birinci eşelon yarımadadan Orta Asiyağa yollanğan edi. Umumen 180 biñ kişi sürgün etildi.
Şu künü qırımtatar sürgünliginiñ qurbanlarını añma tedbirleri keçirile.
Ukraina Yuqarı Radasınıñ qararına köre, mayısnıñ 18-i Qırımtatar halqınıñ genotsid qurbanlarını añma künü olaraq ilân etildi.
