Kyivdeki Qırım evinde mayısnıñ 16-nda Zarema Yalıboylunıñ qırımtatar genotsidiniñ 75 yılına bağışlanğan «Sürgünlik sımaları» fotosergisi taqdim etildi.
Sergi, sürgün etilip sağ qalğan ve Qırımğa qaytqan adiy insanlarnıñ fotosüretleri ve ikâyeleri vastasınen sovetler akimiyetiniñ cinayetleri aqqında tarif ete. Qırım.Aqiqat mühbiriniñ bildirgenine köre, sergide süretleri taqdim etilgen insanlarnıñ çoqusı o vaqıt daa pek küçük olğan olsalar da, mayısnıñ 18-nde olğan adiseni tafsilâtlı şekilde hatırlaylar.
Sergi teşkilâtçılarınıñ qayd etkenine köre, yıl-yıldan Stalinniñ qırımtatar halqı sürgünliginiñ şaatları daa az qala.
Fotosergi taqdim etilgen soñ ziyaretçilerge qırımlı rejissör Galina Cikayeva ve dramaturglar Den ve Yana Gumannıylarnıñ «Trava probivayet zemlü» performansı numayış etildi.
Leyhanıñ temelinde – zemaneviy qırımtatar şiiriyeti, Amnesty Internationalnıñ Ukraina Şarqında insan aqlarınıñ bozuluvı ve işkencege dair esabatı, «KrımSOS» azırlağan Qırımdaki işkenceler esabatı, BM insan aqları Yuqarı komissarı idaresiniñ maruzası ve vesiqalı şaatlıq. Bu vesiqalardan fizik teatr ve yañı akademik olmağan muzıka meydanğa kele.
