Fevral 26-sında Kyivde “Mıstetskıy arsenal” (“Sanat arsenalı”) Milliy medeniy-bediiy ve müzey kompleksinde “Qırımnıñ acayip ikâyeleri” bediiy sergisi açıldı, dep bildire Qırım.Aqiqat mühbiri.
“Sergige, Ukrainanıñ 15 müzeyinden ve şahsiy toplamlardan eksponatlar ketirildi. Qayt etmek kerek ki, o Qırımda yazı peyda olmasından evel devir aqqında ve orta asırlar aqqında tasvirley. Bundan ğayrı, sergide tariy nesnelerden ğayrı, zemaneviy sanat da numayış etildi. Bu em de ukrain resamları, em de er kes yapıp baqa bilgen interaktiv”, - dep aytıp berdi sergi aqqında Qırım eviniñ vekili Alim Aliyev.
Onıñ aytqanına köre, sergi mayısnıñ 5-inece devam etecek.
Ukrainada fevralniñ 26-nda, «Qırımnıñ Rusiye işğaline qarşı tirenüv künü» qayd etile.
2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarı olğanlar, hususan «Rus birligi» firqası çıqtı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
