Link açıqlığı

Saatnıñ esas haberi

Kyivde qırımlı siyasiy mabüslerge qoltutmaq içün «Bir vucud» aktsiyası keçirilecek


Qırım Muhtar Cumhuriyeti musulmanları diniy idaresiniñ toplaşuv zalında mayısnıñ 2-nde qırımlı siyasiy mabüslerge qoltutmaq maqsadınen «Bir vucut» aktsiyası keçirilecek, dep haber etile ATR telekanalınıñ jurnalisti Seytumer Seytumerovnıñ Facebook kanalında.

«Tedbir Rusiyeniñ Qırımnıñ ekinci ilhaqı devamında soñki ve eñ büyük taramağa bağışlana, tarama neticesinde 24 qırımtatarı tutuldı ve şimdi SİZOda buluna», – dep aytıla haberde.

Aktsiya çerçivesinde qırımlı siyasiy mabüslerge ve qorantalarına birdemlik ve qoltutuv maqsadında qırımtatar halqınıñ ukrain ve halqara aq qorçalayıcı teşkilâtları ve bütün musulmanlarnen işbirliginiñ müimligi aqqında maruza oqulacaq.

Seytumer Seytumerov martnıñ 27-nde qırımtatarlarnıñ evlerinde keçirilgen tintüvler, bu insanlarnıñ ayatı ve Qırım sakinleri olarnı nasıl bilgeni aqqında maruzanı oquycaq.

Bundan ğayrı, Qırımtatar Milliy Meclisiniñ reisi Refat Çubarov vaqtınca işğal etilgen Qırımda qırımtatar halqını, insan aqları ve serbestligini qoruv saasında Qırımtatar Milliy Meclisiniñ halqara faaliyetiniñ esas yönelişleri aqqında aytacaq.

Teşkilâtçılar aktsiya SİZOda ve apishanede tutulğan qırımlılar ve «işğalci Rusiye akimiyeti tarafından repressiyalarğa oğratılğan qırımtatar halqına ve avtoritar memleketlerde qanunsız taqip ve repressiyalar oğratılğan er keske yardım ricasınen» duanen yekünlenecek, dep bildire.

Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız şekilde tuta. Olarnıñ sırasına 2018 senesi noyabrniñ soñunda Qara deñiz yalısında zapt etilgen 24 ukrainalı deñizci ve Donbastaki esirler kirmey.

Ukraina Yuqarı Radası reisiniñ birinci muavini İrına Geraşçenko bildirgenine köre, Ukraina, Rusiyede ve işğal etilgen Qırımda tutılğan ukrainalı reine ve siyasiy mahkümler azat etilsin dep, Ukraina devletine qarşı cinayet işlegen 60 Rusiye vatandaşını bermege azır.

Aq qorçalayıcılarnıñ malümatına binaen, Rusiye ve ilhaq etken Qırımda 60-tan ziyade Ukraina vatandaşı siyasiy sebeplerden dolayı serbestlikten marum etildi. Ukraina Tış işleri nazirligi Rusiyege anda tutulğan ukrainalılarnı azat etmesi talabınen 300-ge yaqın nota yolladı.

XS
SM
MD
LG