Kyivde dekabrniñ 11-nde «Milliy aq qorçalayıcı konferentsiyasıDegil» çerçivesinde qırımlı aq qorçalayıcılar esas Ukrainadaki işleri aqqında ikâye etti.
Qırım aq qorçalayıcı gruppasınıñ koordinatorı Olga Skripnikniñ aytqanına köre, Qırımda ukrain kimligine qoltutqan bütün teşebbüsler müim ola.
«Şunıñ içün Ukraina devlet olaraq Qırımda doğğan ve yaşağan vatandaşlarına ukrain vesiqalarını berüv sistemasını yahşı yapmaq kerek. Keçiş noqtaları olar içün baryer degil de, açıq qapu olmalı. Bizler ise qırımlılarnı tek qurban olaraq aytmamalımız, insanlar anda yaşap, ukrainalı olıp qalmağa devam etkenini aytmaq müimdir», – dep qayd etti o, dep bildire Qırım aq qorçalayıcı gruppasınıñ Facebook saifesinde.
Skripnikniñ aytqanına köre, Qırım aq qorçalayıcı gruppası aman-aman altı yıl devamında Qırımda insan aqları bozulğanına dair monitoring keçire.
Dekabrniñ 10-nda VI Qurultay delegatları ve qırımtatar milliy areket faalleriniñ beyanatı aydınlatıldı, anda işğal etilgen Qırımda insan aqları ve serbestligi bozulğanı aqqında aytıla.
Ukraina Tış işler nazirligi, işğal etilgen Qırımda ukrain ve qırımtatarlarnıñ aqları «daimiy sürette bozula», dep bildirdi. Müessiseniñ qayd etkenine köre, «al-azırda Qırımda sahte qabaatlavlar boyunca eñ az 35 qırımtatarı tutuldı».
Rusiye Tış işler naziri Sergey Lavrov ise noyabrniñ 27-nde işğal etilgen Qırımda insan aqlarınıñ bozuluvı aqqında laflar uyduruv ola, dep ayttı.
