Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Azatlıq Radiosınıñ (Qırım.Aqiqat leyhası) ştattan tış hadimi olğan Vladislav Yesipenkonıñ tutuluvı ve apiske alınuvınen bağlı cinaiy tahqiqat başlattı, dep haber ete.
«Prokuraturanıñ reberligi altında «Azatlıq Radiosınıñ» (Qırım.Aqiqat leyhası) hadiminiñ vaqtınca işğal altındaki yarımadada azatlıqtan qanunsız marum etilüvinen bağlı cinaiy tahqiqat başlatıldı. İşğalci «uquq qoruyıcılarnıñ» areketleri Ukraina Ceza kodeksiniñ 146-ncı maddesiniñ 2-nci qısmına istinaden (azatlıqtan qanunsız marum etüv) tasnif etildi», – dep aytıla müessise haberinde.
Madde beş yılğa qadar azatlıqnı sıñırlav ya da aynı müddetke azatlıqtan marum etüv cezasını bere. Mahkemeden evelki tahqiqatnı Qırım Muhtar Cumhuriyeti ve Aqyarnıñ Ukraina Milliy politsiyasınıñ idaresi tarafından alıp barılacaq.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi. FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Yesipenko martnıñ 9-nda Aqmescitte Taras Şevçenkonıñ doğğan künü munasebetinen keçirilgen aktsiyadan soñ tutuldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Ukraina jurnalistleri milliy birligi Yesipenkonı acele azat etmege çağırdı. Ukraina aq qorçalayıcıları beyanatlarını derc etip, Rusiye akimiyetinden Vladislav Yesipenkonı azat etmesini talap etti, Ukraina ve halqara toplulıqnı ise işğal etilgen yarımadada Rusiyege qarşı basqını quvetleştirmelerine çağırdı.
