Salı künü, fevralnıñ 2-nde Kyivde “Jovten” kinoteatrinde “Qırım. Suvsızlaşma” adlı vesiqalı filmniñ ilk kösterilmesi olıp keçecek.
Eksklüziv filmni “Qırımtatar resurs merkezi” ve “Dünya ve KO vaqfı. Arbiylerge yardım etken teşkilât” Hayriye vaqfı taqdim etecek.
“Filmde zemaneniñ eñ aktual mevzularında bir kösterile: yarımadada suv qıtlığı. İşğalcilerniñ suv menbalarınıñ qullanuvına ferasetsiz yanaşması aydınlatıla. Qırım yarımadasınıñ yerli ealisi ögünde “suv meselesi” ile bağlı bütün uydurmalarnı yoq etmek içün er kesni filmniñ ilk kösterilmesine davet etemiz”, – yazıla ilânda.
Film Kyiv vaqtınen saat 17:10 başlanacaq. Koronavirus pandemiyası sebebinden tayin etilgen sıñırlavlarnı köz ögüne alıp, iştirak etmege istegenlerni evelden qayd etilmege çağıralar.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
