«Qırımda ilk ölüm Reşat Ametov olğanını epimiz hatırlaymız» – Kyivde Qırımda insanlarnıñ hırsızlavını tahqiq etmege talap ettiler (fotoresimler)

Qırım.Aqiqat mühbiriniñ bildirgenine köre, bu «KrımSOS» cemaat teşebbüsiniñ faalleri er ay keçirgen 32-nci aktsiya ola. Onı 2014 senesi martnıñ 3-nde hırsızlanğan qırımlı Reşat Ametovğa bağışladılar.

«Qırımda ilk ölüm Reşat Ametov olğanını epimiz hatırlaymız. İşğal etilgen Qırım tarihında ilk sefer insan hırsızlanğan edi. Amma o vaqıttan berli bir tahqiqat keçirilmey», – dep ayttı aktsiya vaqtında «KrımSOS» cemaat teşebbüsiniñ koordinatorı Tamila Taşeva.

Aktsiya vaqtında faaller Reşat Ametovnı hırsızlağanlarnıñ betleri körüngen levhalarnı bilgisayarda kösterdi.

Faallerniñ malümatına köre, Rusiye Qırımnı ilhaq etken soñ, Qırımnıñ 44 sakini coyulğan, 15-i aqqında alâ daa iç bir malümat yoq.