Kyivde noyabrniñ 18-nde «Qırım ve qırımtatar halqınıñ tarihı» dersligi ve qırımtatarlarnıñ tarihı, medeniyeti ve sanatı aqqında dersler ile online platforma taqdim etildi.
«Qırım ailesi» cemaat birleşmesiniñ reberi Anife Kurtseitovanıñ aytqanına köre, Qırım tarihı dersligi eki tilde basıldı – ukraince ve qırımtatarca.
«Bu afta bu dersliklerni Ukrainanıñ çeşit regionlarına ve çetelge yollap oldıq. Ukraina medeniyet fondunıñ yardımınen 1000 nusha çıqtı – 500-i ukraince ve 500-i qırımtatarca», – dedi o.
Derslik müellifleri tarihçılar Gülnara Bekirova, Serğiy Gromenko, Andriy İvanets, Yuliya Tişçenko, Bekir Ablayev ola.
«Bu derslik balalar içün dep yazılğan, amma oquyıcıları daa çoq. Asırlarnen Rusiye, soñra ise sovet imperiyası şaraitlerinde qalğan halqlar içün tarihını bilmek ve onı öz tarihçılarınıñ baqışınen körmek pek müim», – dedi Qırımtatar Milliy Meclisiniñ reisi Refat Çubarov.
Ukraina prezidentiniñ Qırım Muhtar Cumhuriyeti ve Aqyar şeerindeki daimiy vekili Anton Korınevıçnıñ fikirince, bu derslik basılğan soñ nevbetteki adım – kitapnıñ tasil müessiselerinde olması.
«Qırım ailesi» cemaat teşkilâtı online platformanı, Qırım, qırımtatarlar, medeniyet ve sanat tarihı aqqında video ve uzaqtan derslerni taqdim etti, dep haber etilgen edi. Tasil kursınıñ müellifleri arasında – rejissör Ahtem Seitablayev, çölmekçi ressam Rustem Skibin, alıp barıcı ve yırcı Elzara Batalova, qırımlı tarihçılar Gülnara Bekirova ve Andriy İvanets.
