Kyivde noyabrniñ 18-nde ve 19-nda «Qırım inciri» dördünci edebiyat yarışınıñ ğaliplerini ilân etecekler, Qırımtatar Milliy Meclisi ve Ukrayına prezidentiniñ Qırım Muhtar Cumhuriyetindeki temsilciliginiñ vekilleri iştirakinen munaqaşa panelleri keçirilecek. Bundan ğayrı, tedbirde «İncir nutqunı» seslendirecek meşur tarihçı Timoti Snayder iştirak etecek.
«Qırım inciri» dördünci yarışı vaqtında jüri yedi nominatsiyada 137 müelliften 292 iş qabul etti: şiiriyet, qırımtatarca ve ukraince nesir, ukrainceden qırımtatarcağa ve qırımtatarcadan ukraincege tercime, bala edebiyatı. Bundan ğayrı, eki mahsus nominatsiyada ğalipler olacaq: «Söz serbestligi» ve «Qırımtatar edebiyatınıñ inkişafına qoşulğan isse».
«Bu cenk vaqtında Rusiye yoq etmege tırışqan toprağımıznı ve kimligimizni mümkün olğanı qadar qorumalımız. Qırım İnciri – böyle leyhalardan bir danesi, o, yarımadağa intellektual baqışımıznı da şekillendire», – dep qayd ete Alim Aliyev, «Qırım inciri» edebiyat leyhasınıñ esasçısı.
«Qırım inciri» – şair, nesirci ve tercimanlar içün ukrain-qırımtatar edebiyat yarışı. Yarış qırımtatar tili ve edebiyatınıñ tarqalmasına ve inkişafına yardım ete, Qırım ve qırımtatarlar mevzusını ukrain edebiyatında aktualleştire, eki medeniyetniñ daa teren ögrenilmesi içün tercimelerniñ peyda olmasına yardım ete. Yarış 2018 senesi iyül ayında tesis etildi, birinci festival 2018 senesiniñ soñunda oldı. O vaqıttan berli er yıl keçirile ve festivalnen yekünlene. Er yıl festival bitken soñ «Qırım inciri» ukrain-qırımtatar antologiyası derc etile. Yarış finalına keçkenlerniñ eserleri basıla.
2020 senesi «Hizb ut-Tahrir davasınıñ» mabüsleri Osman Arifmemetov ve Server Mustafayev «Qırım inciri» ekinci edebiyat yarışı çerçivesinde «Söz serbestligi» nominatsiyasında mukâfat aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
