Kyivde «Knıjkovıy arsenal» çerçivesinde «Şaatlıqlar kitabı: Qırım işğaliniñ anatomiyası» cıyıntığı taqdim etildi. Onı qırımlı jurnalist, Qırım.Aqiqat müellifi Anna Andriyevskaya ve Ukraina milliy hatıra institutınıñ hadimi Yelena Halimon beraber yazdılar.
Müellifler cıyıntıqqa em esas Ukrainağa köçken qırımlılarnıñ hatıralarını, em de ilhaq etilgen yarımadada qalğan qırımlılarnıñ hatıralarını kirsetti. Kitapnıñ bir qısmı qırımlılarnıñ yarımadanıñ arbiy zapt etilüvi, Rusiye mahsus hızmetleriniñ insanlarğa tesir etüv usulları, yarımadada «yaşamağa» tırışqan aq qorçalayıcı areketinen bağlı aytqanlarına bağışlandı, dep aytıla kitapnı çıqarğan neşriyatnıñ matbuat malümatında.
«Şaatlıqlar kitabı. Rusiyeniñ Qırım ilhaqınıñ anatomiyası» 2014 baariniñ Qırım adise-vaqialarınıñ talili ve çoq yıllar devamında buña yardım etken faktorlarğa bağışlana. O adise-vaqialarnıñ arbiy-işğalci mehanizmini cenk silâhanesi degil de, daa çoq söz küçü – yalan ve propaganda – areket ettire edi. Küçlü informatsion tedbirleri olmasa edi, Qırımnı zapt etüv tedbiri Rusiye içün o qadar muvafaqiyetli ve tez olmaz edi», – dep aytıla kitapta.
Kitap müellifleri «2014 senesi baarde qırımlılar qorquzılğan ve şimdi Ukrainağa ait yarımada zaptını aqlamaq içün Kremlniñ qullanğan mifleri» nasıl peyda olğanını ikâye ve talil ete.
Anna Andriyevskaya Qırımda doğıp yaşadı, 2014 senesi Rusiye mahsus hızmetleri ve yerli rus quvetleriniñ basqısı sebebinden yarımadanı terk etmege mecbur oldı. Şimdi Kyivde yaşay, Qırım.Aqiqat müellifi ola. Habarcılıq, akimiyetni suistimal etüv ve insan aqlarınıñ bozuluvınen bağlı bir çoq maqaleniñ müellifi ola.
Yelena Halimon Volında doğdı, 2004-2007 seneleri Qırımda umumukrain radiosınıñ mühbiri ve «Media Krım» Aqmescit internet neşiriniñ muarriri olıp çalışqan edi. 2015-2016 seneleri Kyivde qırımlılarnen beraber «Qırımnıñ sesi» haber agentligini qurdı. «Qırım: işğal vaqtı» programmasını alıp bardı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
