Bazarertesi künü, oktâbrniñ 7-nde, Kyivdeki Rusiye elçihanesi ögünde «Putinniñ mahkemesi» aktsiyası ötkerilecek. Bu künü Rusiye prezidenti Vladimir Putin 67 yaşını qayd ete.
Teşkilâtçılarnıñ malümatına köre, aktsiya vaqtında eski siyasiy mabüsler «sanalaştırılğan «Gaaga mahkemesinde» şaatlıq etecek». Böylece faaller Rusiye prezidentini doğğan kününen tebriklemege qarar aldı.
Aktsiyada diger memleketlerniñ vatandaşları da iştirak etecek. Eski siyasiy mabüsler İsmail Ramazanov, İgor Movenko, Aleksandr Kostenko, Roman Ternovskiyniñ çıqışta bulunması beklenile.
Aktsiya Kyiv saatine köre 11:00-da başlanacaq.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
