Salı künü, noyabrniñ 2-nde, Halqara jurnalistlerge qarşı cinayetler içün cezasız qaluvnı toqtatuv kününde Ukraina evinde (Kyiv) 2014 senesinden soñ Qırımda faal ve jurnalistlerniñ taqip etilüvi aqqında tarif etken «Qırım, saba saat 5» adlı vesiqalı performans taqdim etilecek.
Qırım.Aqiqat, Kyiv saatınen 19:00-da başlanacaq performansnı canlı yayında kösterecek.
Tedbir teşkilâtçıları bildirgenine köre, leyha iştirakçileri pyesanıñ ikâyesini performativ oquğanda seyirci qaramanlarnıñ qorantaları, beklevleri ve qorqularınen, 2014 senesinden 2021 senesine qadar qırımtatar ziyalıları ve «Qırım birdemligi» cemaat birleşmesiniñ faal cemaat erbapları taqip etilgende başlarına kelgen şeylernen tanış olacaq.
Performans iştirakçileri arasında: qırımlı ukrain yırcısı Jamala, Amnesty International Ukraine müdiri Oksana Pokalçuk, jurnalist, aq qorçalayıcı, cemaat erbabı Mıroslava Ğonğadze, qırımlı ukrain jurnalisti, «Ukrayınska pravda» online neşiriniñ baş muarriri Sevgil Musayeva, qırımlı ukrain rejissöri Ahtem Seitablayev, «Bumboks» solisti Andriy Hlıvnük, jurnalist, «Svoboda slova na ICTV» alıp barıcısı Vadim Karpâk, oyuncı Yekaterina Molçanova, GoA ukrain gruppasınıñ solisti Yekaterina Pavlenko «Pover v sebâ» hayriye fondunıñ qurucısı İrina İvançik, yazıcı Yekaterina Kalitko.
Natalya Vorojbit ve Anastasiya Kosodiyniñ pyesasına esaslanğan vesiqalı performans 11 vatandaş jurnalisti ve ailelerinen yazılğan intervyülardan ibaret.
Performans rejissöri – Dmitriy Kostüminskiy, leyha reberleri – Alim Aliyev, Nadejda Sokolenko, prodüser – Veronika Sklârova. Bu leyha ABD halqara inkişaf agentligi ve Qırımtatar Milliy Meclisiniñ yardımınen Dollmen teatr şirketi tarafından yerine ketirildi.
«Qırım, saba saat 5» leyhasınıñ maqsadı ukrain ve dünya toplulığınıñ diqqatını Rusiye işğal etken Qırımda insan aqlarınıñ bozuluvına celp etmektir. Leyhağa «Qırım, saba saat 5» vesiqalı pyesası ve performans-vesiqası, pyesalı kitap ve leyha qaramanları aqqında malümat, interaktiv sayt ve er kesniñ qoşulması mümkün olğan siyasiy mabüslerge ve Qırımdaki qorantalarına qoltutuv kampaniyaları kire.
Leyha siyasiy mabüs olğan vatandaş jurnalistleri, taqip ketişatı, olarnıñ qorantaları ve işğal altındaki Qırımda qırımtatarlarnıñ yaşayışı aqqında malümat bere.
Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».
Sentâbrniñ 15-nde Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep ayttı.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirdi. Rusiye insan aqları vekâletlisi Tatyana Moskalkova Qırımda «milletlerara ve dinlerara barışıq» bar ve tamır halqqa yardım kösterile, dep aytqan edi.
