Rusiyeniñ Ukrayınağa qarşı yapqan daa bir kütleviy ücümi neticesinde bir raketa Krıvıy Riğde mesken evge tüşti, Kyivde bir qaç patlav oldı. Bu aqta Ukrayına akimiyeti bildire.
Kyiv şeer yolbaşçısı Vitaliy Klıçkonıñ malümatına köre, patlavlar Ukrayına paytahtınıñ Desnânskıy, Dniprovskıy, Ğolosiyıvskıy rayonlarında oldı. Tafsilâtlı bir malümat şimdilik yoq.
Ukrayına prezidentiniñ ofisi Krıvıy Riğ şeerinde raketa darbesi neticesinde mesken ev zarar kördi, dep bildirdi. Viraneler bar, altında insanlar ola bile.
Sumı vilâyetinde kütleviy raketa ücümi sebebinden elektrik yoq, dep bildirdi vilâyetniñ arbiy memuriyet yolbaşçısı Dmıtro Jıvıtskıy.
Bundan ğayrı, Rusiye arbiyleri Harkiv vilâyetiniñ kritik infrastrukturasına üç darbe endirdi.
Poltava vilâyetiniñ arbiy memuriyeti de ava mudafaa sisteması çalışa, dep bildirdi.
Dekabrniñ 16-nda saba bütün Ukrayınada avadan telüke bar, dep ilân etildi. Mıkolayıv vilâyetiniñ arbiy memuriyet yolbaşçısı Vitaliy Kim Rusiye Ukrayınağa qarşı raketa attı dep, telükeni körmemezlikke urmamağa çağırdı.
Rusiye uçucısız ve raketalarnı qullanıp, Ukrayına energetika sistemasına kütleviy darbe endire. Rusiye Ukrayına energetik sistemasınıñ büyük qısmına zarar ketirdi, Ukrayınada em planlaştırılğan, em acele elektrik kesüvleri ola.
Ukrayına akimiyeti, böyle ücümler bitse de, 2023 senesi baarinden evel elektrik kesüvlerinden vazgeçmege imkân olmaycaq, dep tahmin ete. Eñ büyük kütleviy darbeler vaqtında Rusiye tahminen 100 raketa qullandı, çoqusını Ukrayına ava mudafaa sisteması tüşürdi, amma bir qısmı maqsadına irişti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
