Kyivdeki Rusiye elçihanesi ögünde iyülniñ 11-nde Bağçasaraydaki «Hizb ut-Tahrir davası» boyunca mahküm etilgen Zevri Abseitov, Remzi Memetov, Rustem Abiltarov ve Enver Mamutovğa qoltutuv aktsiyası ötkerildi. Bu aqta Qırım.Aqiqat mühbiri haber ete.
Aktsiyağa 30-ğa yaqın faal, aq qorçalayıcı, din erbabı çıqtı. Qollarında Qırımda qırımtatarlarğa qarşı taqiplerni toqtatmaq talabı ile yazuvlı şiarlar bar edi.
«Özüm aqyarlım, Qırımda olğanlarnı körmek menim içün pek qıyın. Qırımtatarı olmasam da, böyle vaqıtlarda, qırımtatarlar çekişkende, özümni de qırımtatarı dep sayam. İnsanlarnı boş yerde, bir qabaatı olmağanda qabaatlaylar, olarnı qorumaq, qoltutmaq kerekmiz. Çünki bu Ukrainanıñ bir qısmı, anda, Qırımda qalıp, bütün usullarnı qullanıp küreşeler», – dep ayttı faal Ruslan Gutsul.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
